دليلك لمقابلات المستخدمين، طرق غير تقليدية مجربة

seo company

This story is a part of UX Planet Arabic community

في البداية بس باقول ان دي طرق غير تقليدية عن كل اللي قريته في الكتب، ده مش معناه ان ماحدش بيعمل كده بالفعل، وارد يكون ناس تانية بتعمل ده بس أنا باكتبهم هنا علشان كل الناس اللي بتشتكي دايما إنها مابتلاقيش مستخدمين تعمل معاهم المقابلات وتاخد انطباعاتهم.

مقدمة

على مدار الـ3 أيام اللي فاتوا كنت بأحضر Techne Summit لأسباب متعددة. واحدة منها هو مقابلة بعض المستخدمين المحتملين لبرنامجين شغال عليهم حاليا. التجربة كانت كويسة جدا وده اللي شجعني أكتب المقالة دي -أول مقالة أكتبها- في نفس الوقت كتير بقابل مصممين مبتدئين بيقولوا ان مش لاقيين مشتركين يعملوا معاهم المقابلات أو ان مافيش ميزانية في الشركة/المشروع للمقابلات، فا حبيت أنقل تجربتي لكل المصممين متحدثي اللهجة المصرية.

إختيار المشتركين

أول خطوة هاتبقى التأكد من ان الشخص اللي بتقابله هو الشخص المستهدف للمنتج اللي بتصممه (Persona) وده بيتطلب انك بتتكلم مع الناس، واحدة من الأسئلة الأساسية بالنسبة اللي باستخدمها لكسر الجليد، هو سؤال بتعمل إيه هنا؟ غالبا الناس اللي بتحضر أي مؤتمر كلها عندها أسبابها مهما اختلفت وده بيخلي الشخص يتكلم وبيكسر الحاجز ده كمان لو اديته المساحة (دي خدعة من علم النفس، الناس بتحس إنها مجبرة تتكلم لملئ الصمت) هايحكي كتير وهايكون عندك فكرة عن مدى توافقه مع شريحة المستخدمين المستهدفة، تقدر برضه بعدها تسأله أي أسئلة تانية مهمة لإستهداف أفضل. بالنسبة لي صفة أساسية كانت ان المستخدمين يكون وعيهم التكنولوجي عالي. (Tech Savvy)

غير تقليدي لا يعني عدم الإلتزام بالقواعد

مهم جدا نحاول دايما نلتزم بأفضل الممارسات الموصى بها أثناء المقابلة نفسها حتى لو اختلفت طرق وصولنا للمشاركين. زي إنك دايما تسيب مساحة للناس تتعامل مع المنتج/النموذج الأولي/الفكرة وانك تكون محايد تماما وتتجنب توجيه المشاركين وتسأل أسئلة بنهايات مفتوحة. مهم جدا برضه تكتب ملاحظاتك اللي بتوصلها ولو هاتسجل المقابلة تستأذن قبلها. -واحدة من النصائح هي انك بعد ما تبدأ تسجيل تقول “زي ما اتفقنا أنا كده بدأت تسجيل” بحيث تحتفظ بالعبارة دي نفسها في التسجيل فا ماحدش يقدر يشتكي انه مكانش عارف انك بتسجل.

ملحوظة جانبيه: كتير من المصممين المبتدئين بيتخيلوا ان الناس هاترفض التسجيل، في خلال تجاربي أقل من ربع الناس بترفض وباوضحلهم ان مافيش مشكلة وباكمل معاهم لو الوضع يسمح.

المقابلات مش كل حاجة

إتأكد دايما إن المقابلات هي الطريقة المناسبة للإجابة عن التساؤلات اللي عندك وحدد انت بتعمل المقابلة بأنهي غرض، غالبا أنا باستخدم المقابلات لـ:

  • التحقق من صحة الإفتراضات (Validating Assumptions)
  • اختبار قابلية الاستخدام (Usability Testing)
  • فهم سياق الاستخدام (Contextual Inquiry)

أسهل طريق لقلب المستخدم، معدته

واحدة من الطرق اللي جربتها مؤخرا برضه أشتري علبة دوناتس 12 قطعة وأعلق عليها ورقة بتقول:

برضه ممكن تجرب تتكلم مع الناس في الكافيه وتعرض عليهم تعزمهم على حاجة، بس الطريقة دي أقل فاعلية من الدونتس. الحلوى المجانية بتخلي الناس هي اللي تيجي تكلمك، بس خليك منفتح شوية وشجعهم. وخلي بالك ان هتلاقي ناس عايزة الدونات من غير ماتعمل المقابلة 😅 -واحدة من النصائح هي انك تلزق بطاقة اسم (name tag) عليها اسمك -هتلاقيهم في محلات ميني سو، أو ممكن تستخدم الملاحظات اللاصقة (sticky notes)

في النهاية، ماتقلقش من المقابلات ودور دايما على الفرص اللي ممكن تقابل فيها مشاركين من المستخدمين المستهدفين للمنتج اللي بتصممه وروح للأماكن اللي هاتقدر تقابلهم فيها. دور دايما على حلول بديلة للظروف المثالية اللي مكتوبة في الكتب علشان بعض المقابلات دايما أفضل من ولا مقابلة.

في النهاية حابب أقول ان دي أول مقالة أكتبها وآرائكوا ونصايحكوا مهمة جدا بالنسبة لي

#تصميم_تجربة_المستخدم #UX #UserExperience

Originally published at https://www.linkedin.com.

Website Design & SEO Delray Beach by DBL07.co

Delray Beach SEO